Aruba completo a biba cu e clasificacion di Allyson Ponson pa e Weganan Olimpico di Rio 2016

Despues cu diahuebs anochi Aruba completo a biba cu e clasificacion di Allyson Ponson pa e Weganan Olimpico di Rio 2016, diasabra ultimo den e competencia na Republica Dominicana, e hoben Mikel Schreuders ta haci otro historia pa deporte di Aruba door di logra su clasificacion pa e Weganan Olimpico di Rio de Janeiro 2016.

Mester bisa cu e den e 200m estilo liber Mikel a landa un tempo di 1:51:17 mientras e tempo exigi pa FINA pa Rio ta 1:51:75. Esaki ta nifica un otro gran logro pa deporte di Aruba, specialmente landamento. Pabien na Mikel, AZB, coach Ismael, mayornan y tur esunnan cu a contribui na e gran exito aki. Awo Aruba tin un total di cinco atleta clasifica pa e Weganan Olimpico di Rio 2016.

 

Read more...

Allyson Ponson a marca historia na Republica Dominicana

Comparti

 

Despues cu Allyson Ponson a marca historia na Republica Dominicana door di bira e prome atleta den historia di e deporte di landamento cu a logra un clasificacion oficial pa e Weganan Olimpico, nos a combersa cu e landado Ponson riba e logro unico aki. Tambe nos a puntre ki sentimento esaki ta pa su persona.

Segun Allyson for di prome dia caba cu e la yega e competencia di Delfines del Naco na Republica Dominicana e la sinti su mes bon. E tabata determina pa logra su clasificacion den su prome intento den awa. Durante di e calentamento su curpa a sinti bon y tabata hopi positivo. Esaki ta algo cu sigur no tabata facil, tabata momentonan di hopi tension paso bo sa cu bo a bay pa cumpli cu un tarea cu bo a prepara bo mes bon pe, aunke den landamento bo nunca sa pa motibo cu ta e tempo indica bo tin cu yega. Tin biaha e ta logra, pero otro biaha no.

Segun Allyson e ora pa haci e prueba di clasificacion a bini inespera, pa motibo cu nan a yama dos otro atleta como tambe uno di Aruba, tur tres masculino y na e momento ey Allyson no tabata programa pa landa su clasificacion.

Diripente su coach a indica na dje pa e tambe haci e prueba hunto cu e otro tres landadonan masculino. Esaki segun Allyson a yuda un poco paso e la landa su prueba sin cu e mester a pensa hopi riba dje. E hecho cu e la haya e oportunidad di landa cu tres landado masculino a yude un poco mas pa motibo cu nan a “trek” su persona bon den awa.

Allyson ta sigui conta cu ora e la yega final e holoshi no a marca. Esaki sigur tabata un momento di suspenso enorme. Nan mester a keda warda basta rato pa e resultado final. Claro cu bo ta nervioso e momento ey paso tur hende kier sa si a logra yega e tempo indica. Ora cu nan a anucia e tempo di 25.89, Allyson tabata sa cu e la clasifica, esaki sigur tabata un momento inolvidabel, e la keda super contento cu e la baha su tempo tambe. Tur e trabou duro, e sacrificio di entrenamento y competencia, e sosten y apoyo di su mayornan y henter famia, su coleganan di landamento, su entenadornan cu a contribui cune durante henter su carera, tur a pone e granito cu awe e la logra su soño tan anhela, esta pa por a clasifica pa participa na e Weganan Olimpico.

Pa Allyson e trabou apenas a cuminsa. E lo kier baha su tempo mas ainda y yega cerca di un tempo A cu ta rond di 25.28. Ainda tin 6 luna di entrenamento duro combina cu algun competencia cu lo por yega hopi cerca di e tempo A. Pa Allyson si e yega e tempo di 25.40 e lo ta super satisfecho aunke e lo kier sigura su mes cu e tempo di 25.28 y esey e lo traha pe den e lunanan cu ta bini.

Read more...Read more...

XXX CARIFTA na Barbados a yega su final 35 Medaya, 1 High Point Trophy, 4 Record di CARIFTA, 6 Record Arubano Open, 8 Record Arubano di Categoria

Read more...Desde Diasabra ultimo 12 landador Arubano ta representando nos isla na Barbados,participando den e Campeonato mas grandi den Caribe pa locual ta trata landamento. E anja aki Aruba su equipo no tabata mes grandi manera ultimo anjanan, pero e calidad di e grupo chikito si tabata presente. Maske cu den punto total Aruba a keda na di 6 lugar cu 348.50 punto, hecho ta cu e teamnan nos dilanti tur tabata tin mas cu 25 atleta,y na momento cu ta compara e calidad di nos landadornan den e tabla di medaya, Aruba tabata na di 4 lugar cu 10 Medaya di Oro, 13 Medaya di Plata y 12 Medaya di Bronze.

Un logro histórico pa e equipo di Aruba, tabata e estafette di Muchamuher categoría 13-14 anja. E 4 damitanan Flory Kock, Keeley Maduro, Anahi Schreuders y Elisabeth Timmer a logra gana 4 medaya di Oro, y na mes momento a pone e Record di Carifta ariba nan nomber. Nunca antes un país por a logra esaki den tur 4 estafette den un categoría, den un solo competencia. E estafette  4 x 50 Free, 4 x 100 Free, 4 x 200 Free y 4 x 100 Wissel  tabata Record pa nan Categoria na Aruba tambe. Pero nan tempo den e 4 x 100 Free y 4 x 100 Wissel estafette tambe ta Record Open nobo pa Aruba. Sigur cu e combinación aki lo sigi causa furor na Peru otro siman durante e Campeonato Sudamericano di landamento.

Mikel Schreuders den categoría 15-17 masculino a logra gana 4 medaya di Oro (200 Pecho, 200 y 400 Wissel y 100 Liber), 1 di Plata (50 Liber) y 1 di Bronze den 400 Liber, y asina tabata e landador cu a score mas hopi punto den su categoría. Den e mesun categoría Patrick Groters a sali na di dos lugar, cu 1 Medaya di Oro den 1500 Liber, 4 di Plata (200 y 400 Wissel, 400 liber y 200 Lomba) y 1 di Bronze den 100 lomba. Patrick a kibra 3 record di Aruba den su categoría y tambe di Open den 100 y 200 lomba, y 1500 liber.

Flory Kock a logra gana 1 medaya di Oro (200 liber) y 2 medaya di Plata (100 y 800 Liber).

Keeley Maduro a gana medaya di plata 3 biaha,esta den 200 y 400 Wissel y den 400 liber. Den 100 Vlinder Keeley a gana Medaya di Bronze, y a pone Record Arubano nobo pa su categoría y Open tambe.

 

Den categoría 13-14 anja Daniel Jacobs a logra gana 2 medaya di Plata y 3 di Bronze ,mehorando su temponan den tur evento.

Rebecca Maduro den categoría 15-17 a gana medaya di Plata den 100 Vlinder y tambe 3 medaya di Bronze,esta den 400 Wissel, 200 Vlinder y 50 Liber.

Gwennandy Kock representando Aruba pa di prome biaha den exterior a bin cas cu 2 medaya di Bronze den 50 y 100 lomba.

Cu su prome anja den categoría 13-14 Brandon Cheong a gana medaya di Bronze den 50 pecho.

Aunke no tur atleta a gana medaya, tur 12 a yega final y a contribui na e puntonan pa Aruba. Andrea van den Berg den 200, 400 y 800 liber. Lucien Peterson tambe den su promer competencia Internacional representando Aruba a logra yega final den 50, 100 y 200 Liber. Anahi Schreuders a yega final den 50 y 100 Pecho y tambe den 100 Liber. Elisabeth Timmer a drenta final den 50 Liber y 100 Vlinder.

CARIFTA un biaha mas tabata exitoso pa Aruba su landamento pero awor 9 landador di e grupo aki ta biaha pa Lima, Peru, pa participa den e Campeonato Sudamericano.

AZB ta felicita tur 12 atleta,como tambe Coach Ismael Santiesteban y Coach Ynocente Chacon, cu e tremendo resultado pa Carifta 2015, y ta desea e delegashon cu ta biaha pa Lima hopi éxito den e Campeonato CONSANAT 2015.

 

 

sr. Ismael Santiesteban ta entrenando e seleccion nacional di landamento

Despues di hopi aña cu coach nacional di landamento di Aruba, sr. Ismael Santiesteban ta entrenando e seleccion nacional di landamento, e ta mira fruto di e trabou duro cu tur hende ta bin ta haci durante añanan na bienestar di e deporte di landamento y su atletanan.

Un trabou di conhunto cu awe a pone cu Aruba tin dos atleta ya clasifica pa e Weganan Olimpico di Rio 2016 y cu e posibilidad pa un of dos mas cu por yega e tempo stipula. Coach Ismael semper a bisa cu e lo kier participa cu atletanan clasifica na cualkier Weganan Olimpico. Den añanan anterior esaki no a sucede, pero awo porfin nos a yega. Coach Santiesteban ta masha contento cu un soño cu tabata existi pa hopi a bira un realidad. Un programa a wordo traha, pero den un ekipo esaki a wordo ehecuta, por pensa riba mayornan, coachnan di pasado, CEMEDAR, psicologo, masahista, mediconan, dietista, entrenador di gym, e federacion Arubaanse Zwembond, Comite Olimpico Arubano y asina por sigui menciona hopi mas. 

"Aruba por ta orguyoso di e clasificacion di nos atletanan di landamento. Logra un clasificacion no ta nada facil, tin paisnan grandi cu mas recurso cu no ta logra yega na clasifica un atleta pa e Weganan Olimpico. Mester corda cu Aruba apenas tin un promedio di 150 landado, na cualkier pais tin clubnan cu mas di 300 landado pa no papia mes cuanto miyones di hende rond mundo ta practica e deporte di landamento na nivel competitivo", Coach Ismael a comenta. Cu otro palabra, masha orguyoso nos tur por ta di e deporte di landamento na Aruba, paso tur hende a contribui cu awe nos a logra esaki.

Pa Ismael e compromiso mas grandi apenas a cuminsa, e trabou duro tin cu wordo haci ainda. Awo Ally a drenta cu tempo B y awo e tin cu bay pa e tempo A, pues tin hopi trabou pa haci den e proximo lunanan. Tanto Allyson Ponson como Mikel Schreuders ta bon landado cu talentonan excepcional. Pa tur dos campeonato cu coach Ismael a identifica como importante, cu ta e campeonato mundial y e Weganan Olimpico, Allyson a logra su clasificacion. Mas satisfactorio ta cu Allyson a logra esaki bou propio guia na Aruba pues di tur coach cu a haya e oportunidad di entrena e atleta. Pa loke ta Mikel sigur bo tabata wak e resultado excepcional ta bini y ya cu su 17 aña e ta logra un tempo asina bon.

Como coach mi ta masha contento paso den Caribe, Aruba su landadonan ta wordo considera entre e mihonan den nos region y esaki nos tur sa ora di bishita e diferentre competencianan. Nos atletanan semper a sobresali y laga marcanan atras. Pero a yega e ora pa nos dal un stap mas grandi. Nos tin mas atleta prospecto cu ta biniendo y cu ya caba a causa furor den algun competencia grandi den nos region. Atletanan cu pa aña 2018 ta candidato pa logra e clasificacion den e siguiente Weganan Olimpico Hubenil di Buenos Aires 2018.
Cu hopi positivismo lo sigui traha na bienestar di e atletanan di landamento y sigur cu ayudo di un y tur Aruba lo sigui saca resultadonan mayor den competencianan den futuro.

Read more...Read more...

Comunicado AZB hopi orgulloso di su atletanan di Anja 2014

Diabierna anochi den Ballroom di Marriot Stelaris Aruba a tuma lugar e anochi di Aruba su Premio Excelencia den Deporte pa e anja 2014. Cu un sala yen di atleta, famia y invitadonan special a celebra resultadonan di e mihor atletanan reconosi door di nan federación. Arubaanse Zwembond ta sumamente orguyoso di su atletanan cu a destaca anja pasa.

Pa e disciplina di Synchro AZB a nomina:

Categoria Atleta Prospecto: Sarah Silva
Categoria Atleta te cu 13 anja: Vicotria Geurts
Categoria Atleta 14-18 anja: Kyra Hoevertsz
Categoria Atleta local di anja: Amanda Maduro
Categoria Atleta Internacional di anja: Anouk Eman
Categoria Atleta Equipo di anja: Senior Team CAC

Pa e disciplina di Landamento AZB a nomina:

Categoria Atleta Prospecto Femenino: Rebecca Maduro

Categoria Atleta Prospecto Masculino: Patrick Groters
Categoria Atleta te cu 13 anja Femenino: Elisabeth Timmer

Categoria Atleta te cu 13 anja Masculino: Brandon Cheong
Categoria Atleta 14-18 anja Femenino: Daniella van den Berg

Categoria Atleta 14-18 anja Masculino: Mikel Schreuders
Categoria Atleta Internacional di anja: Jordy Groters

Durante e anochi Kyra Hoevertsz, Brandon Cheong, Rebecca Maduro y Patrick Groters a logra e honor di ricibi e premio pa nan categoría. Masha pabien di parti di AZB

Read more...Read more...Read more...Read more...

No events
Adress: Simulated Text 5863. Aruba. Phone: (685) 256975 - Fax: (685) 256975.
Made By Patrick Groters.
©2014 Aruba Swimming.