Competencia di Open Water den CISC tabata unico den tur sentido
- Details
- Category: Open Water
- Published on Monday, 25 June 2012 23:11
Despues cu algun siman atras a haci un competencia di prueba pa cu e Open Water Compitition, tabata bisto cu Aruba lo bai ta organisando un evento unico y alavez historico, mirando cu nunca antes esaki no a pasa riba nos isla. Diadomingo na salida di solo, ya tur cos tabata na su lugar pa asina ricibi e participantenan di e competencia Open Water den e Caribbean Islands Swimming Championships (CISC) 2012. A traha dia y anochi pa hinca un programa super profesional den otro.
Algun minut prome cu e inicio, e centenares di boluntarionan y e publico tabata cla pa e competencia di Open Water Swimming. Pa exactamente 9or di mainta, Minister di Salubridad Publico y Deporte, Dr. Richard Visser a duna e señal di salida na e 24 landadonan masculino y femenino. Remarcabel ta cu na final e participantenan tabata tin palabra di elogio so pa con profesional e evento a ser hinka den otro. E sitio na unda a tene e Open Water no por a keda sin wordo menciona, Mangel Halto y becindario tabata e lugar ideal pa dicho competencia.
Pa loke ta prestacion di nos atletanan local, mester bisa cu Dillon Willems a logra un medaya di plata den su categoria, Gwendoline Croes tambe a gana un medaya di plata, Carolina Perez a sali na di cuater lugar porcierto perdiendo for di un participante di Sto Domingo den un foto finish. E landadonan Jan Roodzant, Shaquille Vlaun y John Cheng a sali na di cuater y cinco lugar. E Open Water apesar cu el a hiba un preparacion extenso, e organisadornan por ta sigur satisfecho con el a bai. E boluntarionan di tur instancia of organisacion a haci un tremendo trabou.
