Bunita ceremonia di apertura di e Caribbean Islands Swimming Championships
- Details
- Category: CISC 2012
- Published on Sunday, 24 June 2012 21:44
Bunita ceremonia di apertura di e Caribbean Islands Swimming Championships (CISC)
Diabierna atardi, e di 19 edicion di e Caribbean Islands Swimming Championships (CISC) a inicia cu e ceremonia di apertura den e Piscina Olimpico Roly Bisslik na Savaneta. E atardi a cuminsa cu un show di e grupo di baile Popcorn Dancers, mesora despues a yama cada un di e paisnan participante kendenan a desfila dilanti e publico y invitadonan presente. Miembronan nobo di CCCAN esta e islanan di Antigua & Barbuda y British Virgin Islands tabata esnan prome den fila pa habri e apertura, mas cu claro e atletanan di nos dushi isla di Aruba como pais anfitrion tabata e ultimonan den e fila, caminda bou grito y aplauso nan a ser ricibi. Ultimo e oficialnan pa cu e CISC 2012 tambe a forma parti di e desfile. Un momento masha bunita
cu a impacta tur presente tabata ora cu miembronan di Korps Mariniers Aruba a entrega e bandera di Aruba na e seleccionadonan di landamento sincroniza Nathania Taylor, Nikita Pablo, Jitva y Nathifa Sarman, acompaña pa landamento sincroniza di Anouk Eman, kendenan den awa a crusa cu e bandera hibando e un banda di e piscina pa otro, caminda miembronan di Korps Marniers a tuma e bandera over pa asina hisa esaki.
A hiba palabra e atardi aki, presidente di AZB, Sra. Marion Kan, presidente di CCCAN, Sr. Errol Clarke y su Excelencia Minister di Salubridad y Deporte, Dr. Richard Visser. Cada un cu a hiba palabra a yama tur e delegacionnan un cordial bon bini na Aruba y a desea nan tur clase di exito durante di e cuater dianan di competencia. Tambe a duna elogio na Gobierno di Aruba y e patrosinadornan, kendenan a contribui grandemente na e CISC 2012. Sin nan e tabata imposibel pa por a organisa un evento di e magnitud aki. Na final nos atleta di aña 2011, Allyson Ponson a lesa e credo den nomber di tur e landadornan presente, mientras Irina Croes a lesa e credo den nomber di e oficialnan.
Gallery with pictures
- < Prev
- Next >
