Aruba a logra un cantidad di 15 medaya riba e di cuater dia den CISC
- Details
- Category: CISC 2012
- Published on Wednesday, 27 June 2012 18:34
E seleccion di landamento di Aruba a logra un super bon resultado riba e di cuater dia di e campeonato CISC. No menos cu 15 medaya a ser conkista diamars atardi pa nos landandonan, esaki a trece cune cu e tabla di posicion general a bira uno hopi preta, drentando e ultimo dia di competencia cu ta diaranzon atardi. Awor e equipo di Aruba cu tin 718 punto ta solamente shete punto tras di lidernan cu ta Trinidad and Tobago cu tin 724 punto, e di tercer lugar cu ta Puerto Rico tin 414.2 punto.
Nos seleccion nacional ya a logra un puesto historico cu e segundo lugar, paso nunca antes nos muchanan a logra un posicion general asina halto den CISC, pero ainda nan por haci historia si acaso nan logra e prome lugar. Den e standing di medaya awor Aruba tin un record di 53 medaya di cual 22 medaya ta di Oro, 16 medaya ta di Plata y 15 medaya ta di Bronz.
Esnan cu a logra medaya ta:
Ashley Bransford cu medaya di Oro
Dillon Willems cu medaya di Bronz
Daniella van den Berg cu medaya di Oro
Allyson Ponson cu medaya di Plata
Jemal Le Grand cu medaya di Oro
Mikel Schreuders cu medaya di Plata
Florence Kock cu medaya di Bronz
Patrick Groters cu medaya di Bronz
Ashley Bransford cu medaya di Bronz
George Den Dunnen cu medaya di Plata
Valerie Eman cu medaya di Bronz
Marc Willems cu medaya di Plata
Team Aruba 18+ Boys cu medaya di Bronz
Team Aruba Girls 15-17 cu medaya di Oro
Team Aruba Boys 15-17 cu medaya Bronz
Diaranzon lo ta e ultimo dia di e campeonato di CISC cu pa nos seleccion di Aruba ya a bira uno inolvidabel, mirando e cantidadnan di medaya logra. Aruba sigur por ta orguyoso di nos atletanan di landamento, kendenan a percura pa nos tono glorioso Aruba Dushi Tera zona varios biaha den e Piscina Olimpico Roly Bisslik na Savaneta.
