Aruba ta domina comodamente den Synchro

Details

Category: Synchro

Published on Wednesday, 27 June 2012 18:47

Seleccion di landamento sincroniza di Aruba ta dominando e competencia di CISC comodamente. Si e prome dia nos mucha muhernan a arasa den premio, ariba e di dos di competencia esaki no tabata un excepcion. Notable ta cu e seleccionnan invita cu ta Canada y Venezuela a bini Aruba cu un elenco unico pa duna un extra empuhe na e competencia di CISC, asina mes nos muchanan di Aruba a resalta den su totalidad. Dialuna anochi, tabata tin e competencia di Duet, aki un bez mas Kyra Hoevertsz y Abigail den Veer a bolbe logra medaya di Oro pa Aruba, despues di un dia prome a logra esaki den e competencia di solo y den figuranan tecnico.

Abigail a logra e medaya hunto cu Talisah Beke den e categoria 12 anja y menos, mientras Kyra a logra e medaya cu Alexandra Mendoza Torres den e categoria di 13-15 anja. Ademas di e medayanan di oro, Aruba a te hasta logra medayanan di plata tambe den e categoria 12 anja y menos cu e dueto forma pa Erica Jaramillo y Seraphima Fit, mientras cu Nikita Pablo y Nathania Taylor a logra esaki den e categoria di 16 - 18 anja. E medayanan di Brons den e mesun categoria a ser conkista pa Aruba pa e dueto forma pa Ariadne de Goeij y Femke Rutgers den e categoria 13-15 anja, mientras cu e rumannan morocho Nathifa y Jitva Sarman a logra e brons den e categoria 16 - 18 anja.
Diamars anochi synchro lo termina su programa cu e prueba di equipo, caminda cu un conhunto di ocho landador ta presenta nan rutina.
Na final di e campeonato ta calcula tur e puntuacionnan pa defini cua pais ta bira "Overall Winner", cu ta e titulo maximo di e campeonato. Pa e ultimo diesdos anjanan caba Aruba a logra termina na prome lugar overall den tur campeonato regional y manera cos ta mustra na e momento aki, lo sa di defende cu exito e titulo aki.

• < Prev
• Next >