Aruba ta titula campeon den e competencia di CISC 2012 den landamento sincroniza
- Details
- Category: Synchro
- Published on Wednesday, 27 June 2012 20:31
Diamars anochi e competencianan di landamento sincroniza di CISC 2012 a clausura cu e competencia pa equip. Mirando cu den e edad di 13 - 15 anja di edad so tabata tin competencia, tur e atencion a bai riba e grupo aki.
Ta bon pa menciona cu mirando cu Canada tabata e pais invita, a competi pa dos diferente premio esta e CISC cu a bai entre Aruba y Sto Domingo y e Invitational entre Aruba, Canada y Sto Domingo. Prome nos landadonan mas hoben den e deporte di synchro, esaki den e edad di 12 aña y menos a duna nan presentacion como demostracion cu na final a haya un standing ovation di e publico presente.
Despues a sigui cu e competencia den 13 - 15 aña entre e tres paisnan ariba menciona, tabata bisto cu e bataya lo bai entre e Canada y Aruba. Mester bisa cu na final e puntuacion tabata asina cerca unda cu e mucha muhernan di Canada a logra e victoria unda nan a haya un puntuacion final di 65.6815 compara cu Aruba, cu a logra un puntuacion final di 64.2065 y Sto Domingo cu a keda na tercer lugar cu un puntuacion di 51.4515. Esaki ta nifica cu e equipo di landamento sincroniza di Canada a logra e prome lugar den e clasificacion di e Aruba Invitational den e categoria 16-18 aña, cu Aruba na di dos lugar y Sto Domingo na di tercer lugar. Den e categoria di edad 16-18 aña di edad como parti di e Invitational (esta e competencia den cu paisnan invita Venezuela y Canada a participa, banda di e islanan di Caribe), Aruba a titula campeon.
Pa loke ta e competencia di CISC, Aruba ta logra un prome lugar y Sto Domingo a keda na di dos lugar. Pa sera e anochi, nos atleta elite den landamento sincroniza y actualmente studiando na Merca, esta Anouk Eman a duna un bunita presentacion na e publico presente.
Mester bisa cu e competencia di CISC den landamento sinconiza a finalisa cu un tremendo happening, caminda tur e delegacionnan presente a realisa diferente baile den e pool chikito, e amistad entre e atletanan tabata uno bunita pa mira.
Por ultimo a haci entrega di e trofeonan na e respectivo coachnan di e paisnan cu a triunfa. Durante e ceremonia di clausura di CISC lo entrega e trofeonan di campeon tambe na e equiponan di synchro. Un pabien na e equipo di Aruba cu nan titulo como e campeonnan indiscutibel
