Den e fase preliminatorio e landado Allyson Ponson a competi den e 50 lomba unda e la start den caryl number 2. Aki Allyson ta logra marca un tempo di 32.64 cual tabata un record personal nobo. Allyson ta drenta na di 5 luga y ta logra clasifica pa e final B ya cu e prome cuater temponan ta bay final A. Den e final B, Allyson no ta logra mehora su tempo di mainta y ta landa un tempo di 32.86. Asina mes Allyson ta logra e prome luga den e final B. Tres aña pasa durante di e Weganan Panamericano na Guadalajara, Mexico e atleta Ponson a logra sorprende tur hende door di yega dos final B. Actualmente Allyson ta studiando na Hulanda unda e ta haci un tremendo papel cu su club di landamento.

Pa loke ta e atleta masculino Jordy Groters esaki a competi den e 100m freestyle. Mester bisa cu Jordy a start den caryl number 7. Aki den un tremendo competencia y hopi cera Jordy ta drenta como e di 5 luga cu un tempo di 53.31. E split time di Jordy tabata 25.64. Cu e tempo aki Jordy a logra e final B di 100m cual lo tuma luga den oranan di anochi. Den e final B, Jordy ta logra kibra su record personal ora e ta landa un tempo nobo di 52.80, su marca anterior tabata 52.93.Cu esaki e ta termina na di tres luga den e final B. 
Mescos cu Allyson e atleta Jordy Groters tambe ta un prospecto grandi den landamento unda actualmente e ta bibando na Merca y ta bishitando University of Missouri. E atleta Groters ta forma parti di e ekipo di landamento di dicho scol, Missouri Tigers.

Ta bon pa menciona cu e dos eventonan aki no ta esnan mas fuerte di ambos atleta Arubano. Allyson su disciplina faborito ta e 50m freestyle mientras di Jordy ta e 50 y 100m pecho.