Jemal LeGrand y Jordy Groters den Campeonato Division 1 na USA

Nos landadornan studiante na Estados Unidos, esta Jemal LeGrand y Jordy Groters,  e ultimo dos siman a participa den Campeonato di e diferente Conferencianan den Division 1. Siman pasa a tuma lugar e Campeonato di e Conferencia South Eastern Conference SEC na Auburn Alabama cu participación di scolnan fuerte manera University of Florida, Auburn, Tennessee  y Georgia. Jordy Groters a wordo selecta door di scol University of Missouri pa participa den 3 evento individual na e Campeonato aki.

Jordy a cuminsa su competencia e promer dia cu 50 Liber na unda e a logra landa su mihor tempo 20.07  sorpresando su mes pa qualifica pa Final C y tambe a wordo selecta pa ta den e 4 x 50 Liber estafette. Den estafette Jordy a landa pa promer biaha un 19.91. Su equipo a yega na di 6 lugar cu tempo B pa Campeonato Nacional na luna di Maart.  Hopi felis Jordy a sigi e Campeonato cu presentación den 100 y 200 Schoolslag. Jordy a logra yega final C den ambos y den 100 a logra landa otro tempo personal record 54.19. Den 100 Jordy a touch muraya promer como e ganador di e Final C, asina yudando su scol cu mas punto.

Tur 3 di su evento individual Jordy tin tempo B pa e Campeonato Nacional NCAA división 1, pero awor lo mester warda si su temponan ta suficiente liher pa wordo selecta pa bai competi na Iowa City, Iowa dianan 26-28 di Maart próximo.

Jemal su scol, Florida State University ta participa den e Atlantic Coast Conference ACC, di cual su Campeonato a tuma lugar na Georgia Tech na Atlanta, Georgia.  Den ACC scolnan fuerte den deporte di landamento ta Georgia Tech, North Carolina State, University of North Carolina y Louisville. Jemal a wordo selecta pa representa su scol den 50, 100 y 200 Freestyle y tambe Jemal a wordo scohi pa ta den e 4 x 200 F Liber estafette.  Jemal a cuminsa e campeonato e promer dia cu su estafette na unda nan termina na di 8 lugar,logrando score 44 punto pa su scol. Individual Jemal a landa temponan cerca di su mihor tempo pero no por a yega qualifica pa finalnan. Den 50 Liber, Jemal a finalisa na di 51 lugar, cu 20.83, den 100 Liber na di 48 lugar cu 45.46 y den 200 Liber na di 37 lugar cu 1:39.14. Pa Jemal tambe lo tin chens di bai competi na e Campeonato Nacional na IOWA den e 4 x 200 estafette, den caso cu su scol lo wordo selecta.

E temporada di Universidad y College ta termina después di e Campeonato Nacional na IOWA y lo cuminsa bek luna di Augustus.  Division 1 ta asina competitivo cu tur e universidadnan di nivel halto ta sigi entrena nan landadornan durante en lunanan di April pa Augustus.  Tanto Jordy como Jemal ta den entrenamento pa purba logra temponan clasificatorio pa representa Aruba durante e Weganan Panamericano na Toronto.