Comunicado CONOCE AZB SU SELECION PA CARFITA Y SUDAMERICANO JUVENIL 2015 Edad 13-14 anja

Selecion di landamento di Aruba lo participa na e Campeonato CARIFTA na Barbados e promer siman di April. E 6 landadornan den e categoria 13-14 anja ta un grupo yen di experencia ariba nivel di Carifta Swimming Championships. Den categoría di muchamuher, Aruba tin  4 landador masha fuerte y talentoso, KEELEY MADURO, FLORENCE KOCK, ANAHI SCHREUDERS y ELISABETH TIMMER. Tur cuater landador a gana varios medaya individual y den relevo den e ultimo edicionnan di CARIFTA, y sigur lo ta e equipo mas fuerte den relevo atrobe. Tur 4 damita  lo competi den evetonan individual tambe. Keeley, den vlinderslag y Florence den estilo liber, ambos ta den top landadornan di nos region. AZB tin hopi speransa cu nos himno lo bai zona na BARBADOS pa e dos landadornan aki. Anahi, specialista di pecho, lo ta hopi fuerte den su distancianan. Pa Elisabeth esaki ta e promer anja den e categoría aki, sin embargo su capacidad den liber y lomba sigur lo hibele pa final.

Pa loke ta trata e mucha hombernan, Aruba lo ta bon representa cu BRANDON CHEONG y DANIEL JACOBS.

Pa Daniel esaki ta su di dos anja den e categoría aki, y prospecto ta hopi grandi cu Daniel lo yega final den tur su eventonan cu hopi posibilidad di gana medaya. Aunke cu Brandon ta den su promer anja den e categoría , su temponan den estilo pecho sigur lo ta un di e mas liher nan na Barbados.

Daniel lo competi den tur distancia di estilo liber y tambe den Combinado Individual y Brandon lo competi den  pecho y libre distancia cortico

 

Despues di Carifta, e 6 hobennan aki, esta KEELEY, FLORENCE, ANAHI, ELISABETH, BRANDON y DANIEL lo biaha for di Barbados directamente pa Lima, Peru, pa competi na e Sudamericano Juvenil 2015, cual lo tuma luga dianan 13 pa 18 april. Esaki lo ta e prome biaha cu e grupo hoben aki por participa na e Sudamericano. Tur 6 atletanan lo competi den eventonan individual y den relevo.

 

Sudamericano lo conoce relevo mixto, 2 mucha muher y dos mucha homber. Aruba lo particia den relevo di mucha muher 13-14 y den e mixed relays 13-14.

E campeonato aki ta di nivel hopi halto door di participación di paisnan grandi den landamemto manera Brazil, Colombia, Venezuela y Argentina.

Nos ta desea tur atleta hopi exito den e dos competencianan aki.