Conoce e seleccion di landamento sincronisa bou di 12 aña cu lo competi den e CARIFTA 2014
Conoce e seleccion di landamento sincronisa bou di 12 aña cu lo competi den e CARIFTA 2014
Aruba ta cla pa ricibi e competencia di Carifta 2014 cu dentro di menos cu un luna lo tuma lugar riba nos dushi isla di Aruba. Durante di e competencia di Carifta lo bai tin tres disciplina cu ta landamento, landamento sincronisa y open water cu ta e competencia den lama. Den e simannan benidero nos lo laga e pueblo di Aruba sera conoci cu su digno representantenan kende lo competi contra di e mihor otro atletanan den e region di Caribe, e dianan 22 - 26 di april den e Piscina Olimpico Roly Bisslik na Savaneta.
Como e prome seleccion nos tin e damitanan di landamento sincronisa bou di 12 aña cu ta consisti di 11 atleta. Nan edad ta varia entre 7 - 12 aña. E experiencia di e grupo aki ta grandi y ta conta cu landadornan cu tin 4 aña caba ta landa, pero otronan cu tin apenas 1anja y mei landando. E seleccion di landamento sincronisa ta consisti di Victoria Geurts y Kainah Croes, ambos lo landa un SOLO den e categoria aki. Den e evento di DUET, nos tin Victoria Geurts hunto cu Kainah Croes y tambe Zurienne Dabian hunto cu Meghan Tromp cu lo defende Aruba. Por ultimo, e equipo mes di landamento sincronisa ta consisti di Victoria Geurts, Kainah Croes, Zurienne Dabian, Meghan Tromp, Sarah Silca, Sara Castaño Vidal, Chante Martis y Casey Ann Hermosen. Tur atleta lo landa e parti tecnico cu tambe ta e evento di "Figuras". Den esaki lo participa tambe e atletanan Janelly Piña, Angelina Hamoen y Caroline Alvarez. Mester bisa cu pa hopi aña, Aruba a sa na domina e disciplina aki den region di Caribe y semper a sali vencedor como e overall champion di CARIFTA, y mas cu claro lo kier ripiti esaki atrobe. Nos muchanan di landamento sincronisa ta conta cu e apoyo y sosten di e pueblo Arubano e dianan 22 - 26 di april proximo. Mustra bo patriotismo y bin duna bo sosten na nos muchanan di landamento, landamento sincronisa y esnan di open water swimming.
