Anouk Eman y Kyra Hoevertsz a keda na un di cuater luga na CAC

Diadomingo merdia e Weganan Centro Americano y del Caribe 2014 oficialmente a inicia pa Team Aruba den landamento sincronisa na Veracruz, Mexico ora cu e dueto di Aruba, consistiendo di Anouk Eman y Kyra Hoevertsz a mira accion. Mester bisa cu e dueto di Aruba a duna un tremendo presentacion pero ta keda net cortico pa loke ta un luga riba e podium na Veracruz. E duet Arubano a termina na un di cuater luga cu un puntuacion total di 73.3721 y asina nan ta termina net tras di Venezuela cu a keda cu e medaya di brons cu un puntuacion total di 74.2301. E dos landadonan elite den e deporte di landamento sincronisa bou guia di coach Denise Shively a landa den gran forma y tabata ocupa un di tres luga te na e ultimo competidonan cu tabata Venezuela. Remarcabel ta cu e dueto di Aruba a laga paisnan grandi nan tras manera Cuba, Puerto Rico, Guatemala y Costa Rica. E competencia a wordo domina den su totalidad pa e duetonan di Mexico y Colombia kendenan a termina na di respectivo prome y di dos luga cu puntuacion formidabel. E atletanan Anouk y Kyra lo competi den e dianan binidero na nan segundo evento, cu ta e Dueto Liber, den cual nan tin un otro oportunidad pa tog kisas logra un medaya pa Aruba.
Cuater aña pasa e dueto Amanda Maduro y Anouk Eman a logra e medaya di brons den e Weganan CAC na Mayaguez, Puerto Rico. E actuacion di awe ta uno sublime unda Anouk y Kyra a demostra clase y convence e huesnan y haya un bon puntuacion. Un palabra di pabien ta bay na Anouk Eman y Kyra Hoevertsz cu nan di cuater luga den e Weganan CAC.