Kyra Hoevertsz hunto cu su equipo ta logra gana ORO y ta clasifica pa e Junior National Championships di synchro na Merca

Oranjestad, 11 maart 2015. Ya ta pa di tres anja cu e hoben atleta di e deporte di landamento sincroniza, Kyra Hoevertsz, a establece su mes na California, pa eynan continua su estudio y tambe desaroya su mes den su deporte como miembro di e club Walnut Creek Aquanuts.

Siman pasa e equipo completo a participa na e “West Zone Junior Championship” na, Sacramento, California, caminda cu nan mester a logra supera e puntuacion di 73 punto pa por a gana e derecho di participa na e campeonato nacional di Merca cu equipo den e categoria "junior", cu ta di 14 te cu 18 aña di edad.

Diabierna durante e "West Zone Junior Championships" a toca e prome mitar di e competencia, esta den e figuranan tecnico, y tabata tin no menos cu 90 participante. Figuranan tecnico ta un di e fortalezanan di Kyra y e tabata tin confianza cu esaki lo a bai bon. Kyra a logra un puntuacion total cu a posicion'e na di 12 puesto entre e 90 landadornan, lagando pues un tremendo impresion atras.

Diadomigo a tuma lugar e competencia cu ta e rutina riba musica. Cu un presentacion tremendo di e equipo di "Walnut Creek Aquanuts" ariba musica Irlandes, "Riverdance" a impresiona e jueznan y na final di e presentacion, e puntuacion a wordo presenta: 82.500 punto! Mas cu sufficiente punto di loke nan mester a alcanza pa por a clasifica pa e campeonato nacional! Fuera di esei nan a gana Medaillo di Oro!! Cu un cara di alegria, Kyra a mustra con contento e tabata ta. E la logra su meta.

Bista awor ta cambia pa e Campeonato Nacional Junior di Merca, cu ta tuma lugar na Morago, California di 1 pa 5 April. Eynan Kyra ta competi cu su club Walnut Creek Aquanuts den e evento di equipo y tambe den e evento di Combo.

Despues di e competencia aki Kyra lo bai sigi prepara pa participa hunto cu su Duet Partner di Aruba, esta Anouk Eman pa bai participa na PANAMERICAN Games cu lo tuma lugar na luna di July na Toronto, Canada. Despues di esei Kyra y Anouk lo bai Rusia na unda nan lo participa den World Championships. Esaki ta bai ta un competencia hopi importante pa nan, pa asina por midi nan mes cu e resto di mundo.