Kyra Hoevertsz ta gana 2 Oro durante Campeonato Nacional di Merca di Synchro
Morago, California, US, april 2015. Durante e campeonato nacional mas importante di Merca den e deporte di landamento sincroniza, cu a tuma lugar na e ciudad Morago, California, e atleta di Aruba Kyra Hoevertsz a logra bai cu e titulo máximo den dos evento; Kyra a logra dos medaya di oro den e categoría “junior”, tanto den evento equipo, como pa e equipo combo.
Tur atleta den e deporte di synchro ta prepara henter aña pa e evento aki, cu ta e culminación di lunanan di entrenamento intensivo. Solamente e mihornan ta participa na e campeonato nacional. Pa medio di campeonatonan clasificatorio cu ta tuma lugar prome, cada atleta mester logra e derecho di participa na e Campeonato Nacional, yama oficialmente e “U.S. National Synchronized Swimming Championships”.
Manera ta conoci, Aruba tin su atleta Kyra Hoevertsz, di nivel halto den e deporte di landamento sincronisa cu ta biba, bai scol y entrena na Merca y cu durante e aña escolar ta competi pa nan Club.
Kyra Hoevertsz a participa cu su club "Walnut Creek Aquanuts" den e categoria Juniors. Kyra mester a competi prome den e parti tecnico esta e "figuranan tecnico", caminda e mester a enfrenta no menos cu 151 otro competidor. Na final Kyra a termina na di 17 lugar.
Kyra su siguiente evento tabata e equipo, hunto cu 7 otro compañera di su club. E equipo di Walnut Creek Aquanuts a drenta e ronda final na segundo lugar, net tras di nan eterno rivalnan di Santa Claa Aquamaids, pero den e finalnan nan a presenta nan rutina asina bon, cu nan a sa di logra puntuacionnan mas halto, terminando pues na prome lugar y ganando e medaya di oro!
Pa Kyra tabata tin mas evento riba e programa. Riba e ultimo dia di e competencia, Kyra a participa den e evento "Combo", cu ta un rutina masha creativo cu ta combina tur e eventonan di e deporte den uno. Solo, dueto, y tur landador hunto den varios combinación ta hasi e equipo “combo” hopi gusta pa publico. Ta landa e equipo “combo” cu 10 atleta, pero tin hopi libertad den e coreografia. Cu un rutina cu a expresa “aliens”, e equipo di Walnut Creek a logra sali na promer lugar, ganando asina otro medaya mas di oro pa Kyra.
Mirando atras AZB ta hopi orguyoso di e atletan aki di Aruba cu den e grandinan di Merca ta logra gana medayanan di oro!
Pa Kyra e temporada pa competi pa su club na Merca a termina y awor e ta bai prepara su mes pa bai landa un dueto hunto cu Anouk Eman, pa representa Aruba na competencianan internacional. Na luna di Juli nan lo participa na e Weganan PanAmericano cu lo tuma lugar na Toronto, Canada. Despues di e competencia aki, tambe na luna di juli, nan lo participa na e "World Championships", na Kazan, Russia.
E ultimo competencia aki ta di gran importancia pa e Dueto aki, pa asina tin un idea di e ranking mundialmente. E dueto tin nan bista ariba e Weganan Olimpico, y pa jega asina lew mester clasifica entre e mihor 24 di Mundo!
Hopi exito na Anouk y Kyra y un palabra di pabien pa e resultadonan cu nan a logra.