Duet Anouk y Kyra na caminda pa Rio, Brasil

Cu masha entusiasmo AZB kier informa pueblo, cu Aruba lo participa na e "FINA Olympic Games Synchronised Swimming Qualification Tournament 2016", na Rio, Brasil y lo ta representa pa nos orguyonan nacional den synchro: Anouk Eman y Kyra Hoevertsz.

Palabranan di exito y speransa na e duet aki, sabi cu pueblo ya ta masha orguyoso cu boso logronan.

E competencia lo tuma lugar di 2 pa 6 di maart, den e piscina Maria Lenk na Rio, na unda porcierto lo tuma lugar e Weganan Olimpico mes na luna di Augustus 2016. Durante e competencia aki lo selecciona e paisnan cu lo por participa na e Weganan Olimpico. Ta bai tin solamente 8 equipo y 24 Duet cu lo por participa na e Weganan Olimpico. Pues e lo no bira facil!

 

Ta haci un invitacion na pueblo di Aruba en general y tur mayor y atletanan di Barracudas Aruba, prensa en general pa bin presencia e dos duet di Anouk y Kyra ariba Diahuebs 25 di februari proximo pa 6.30 di atardi na Piscina Olimpico Savaneta. Un y tur ta bon bini pa presencia nan rutinanan, como tambe pa desea nan exito.

Pa mas informacion por like e facebook page di club aki: “Barracudas Aruba”.